பால்கனி – 22092011

அன்புள்ள வலைப்பூவிற்கு,

நம்மூரில் ரஜினி படம் ரிலீசாகும்போது ஒரு எதிர்பார்ப்பு இருக்குமே, அந்தமாதிரி பல மடங்கு எதிர்பார்ப்போடு ஐபோன் ஐந்திற்காக காத்திருக்கிறார்கள் மேலைநாட்டினர். இந்நிலையில் கடந்த வாரம் ஐபோன் 5 வெளிவந்துவிட்டதாக யாரோ இணையத்தில் கொளுத்திப்போட, “வடை போச்சே” என்று பலர் அல்லோலப்பட்டிருக்கிறார்கள். இவர்களுக்கு ஏற்றார்போல ஆப்பிள் நிறுவனத்தின் அளப்பறைகளும் கொஞ்சம் ஓவர்தான். இதுவரை ரிலீஸ் தேதி, போனில் உள்ள வசதிகள் என்று சகலத்தையும் கமுக்கமாக வைத்திருக்கிறது.

தேடாதீங்க... படத்தை சென்சார் செஞ்சிட்டேன்...

Wardrobe Malfunction – உலகெங்கிலும் அவ்வப்போது பரபரப்பை ஏற்படுத்துகிற விஷயங்களில் ஒன்று. சமீபத்தில் மிஸ் யூனிவர்ஸ் போட்டியில் கலந்துக்கொண்ட கேத்தலீனாவுக்கு என்ன நடந்தது என்று கேள்விப்பட்டிருப்பீர்கள். (மேலே பார்க்க படம் – ஹி ஹி சென்சார் செய்யப்பட்டது). இதேபோல, பிரபல பிரிட்டிஷ் மாடல் நவோமி கேம்ப்பெல் ஒரு பியூட்டி பார்லர் திறப்பு விழாவிற்கு வருகை தந்திருக்கிறார். அவர் மரியாதை நிமித்தமாக குனிந்தாரோ என்னவோ உடனே படம் பிடித்துவிட்டார்கள் “கோ”மான்கள். எல்லாம் ஒரு வெளம்பரம் தான்.

மெக்சிகோவில் கஞ்சா கடத்தல் செய்யும் கும்பலால் ஒரு ஜோடி கொலை செய்யப்பட்டிருக்கிறது. அவர்கள் கஞ்சா கடத்தும் கும்பல்கள் பற்றி வலைப்பூவில் தாறுமாறாக எழுதியதால்தான் அவர்களைக் கொன்றோம் என்று அவர்கள் பிணத்தின் மீது எழுதி வைத்துவிட்டு சென்றிருக்கிறார்கள் கொலைகாரர்கள். இந்தமாதிரி இங்கே யாராவது ஆரம்பித்தால் ஒருத்தரும் மிஞ்சமாட்டோம். அவர்களை கொலை செய்து தொங்க விட்டிருப்பதைப் பார்த்தால் நீங்கள் மெர்சலாகக்கூடும். அவன் இவன் கிளைமாக்சை விட கொடூரமாக இருந்தது. பிரசுரிக்க விரும்பவில்லை இங்கே கிளிக்கி பார்க்கவும்.

புகைப்பட கலையில் பேரார்வம் கொண்ட ரஷிய இளைஞனின் கைவண்ணம்

நாசா விஞ்ஞானி Laurance Doyle மற்றும் அவரது குழுவினர் இரண்டு சூரியன்களைக் கொண்ட ஒரு புதிய கிரகத்தை கண்டுபிடித்திருக்கிறார்கள். தற்காலிகமாக “Kepler-16b” என்று பெயரிடப்பட்டிருக்கும் இந்த கிரகம், நம் பூமியில் இருந்து 200 ஒளி ஆண்டுகளுக்கு அப்பால் இருக்கிறதாம். அதாவது நாம் இங்கிருந்து ஒரு நொடிக்கு 186,282 மைல் வேகத்தில் பயணம் செய்தால் கூட அங்கே சென்றடைய இருநூறு ஆண்டுகள் ஆகும். அந்த கிரகத்தைப் பற்றி பல்வேறு ஆராய்ச்சிகள் செய்துக்கொண்டிருக்கும் விஞ்ஞானிகள் அங்கே தண்ணீர் இருக்கக்கூடும் என்று சந்தேகிக்கின்றனர். எப்போதோ சயின்ஸ் ஃபிக்ஷன் படங்களில் பார்த்த காட்சிகள் நிஜத்தில் நடப்பது ஆச்சர்யாமாகத்தான் இருக்கிறது.

வெளிநாட்டு வாழ்க்கை முறைகளை தெரிந்துக்கொள்வதில் ஒரு ஆர்வம். அந்த வகையில் இந்த வார ஸ்பெஷல் வியட்நாம் காபி. (ஏய்... ஏய்... காபியை மட்டும் பாருங்கப்பு...)

சீனாவில் மேல்நிலை நிலை வகுப்பில் படிக்கும் மாணவ / மாணவியருக்கு செக்ஸ், காதல் போன்ற பிரிவுகள் கொண்ட ஒரு பாடத்தை கட்டாயமாக்கி இருக்கிறது கல்வி அமைச்சகம். ஏற்கனவே, உலகில் அதிக அளவில் கரு கலைப்பு செய்துக்கொள்ளும் நாடுகள் பட்டியலில் சீனா முன்னிலை வகிக்கிறது. அதிலும் இருபதிலிருந்து இருபத்தி ஒன்பது வயதிற்குள் இருக்கும் மணமாகாத பெண்கள் நிறைய பேர் கரு கலைப்பு செய்துக்கொள்வதாக புள்ளிவிவரங்கள் தெரிவிக்கின்றன. இந்தநிலையில் இதெல்லாம் தேவையா என்று வழக்கம் போல கொந்தளித்திருக்கிறது சமூக காவலர்கள் தரப்பு. செக்ஸ் கல்வி என்பது கட்டாயம் தான். ஆனால், தொபுக்கடீர் என்று மேல்நிலை பருவத்தில் அறிமுகப்படுத்தாமல் சிறுவயதில் இருந்தே படிப்படியாக கற்றுக்கொடுத்தல் சிறப்பு.

என்றும் அன்புடன்,

N.R.PRABHAKARAN

Post Comment