மயக்கம் என்ன...? – போதும்டா மச்சான்

அன்புள்ள வலைப்பூவிற்கு,

வளர்ந்துவரும் இசையமைப்பாளர் ஜி.வி.பிரகாஷ் இசையில் வெளிவந்துள்ள “மயக்கம் என்ன...?” பாடல்களை முதல்நாளே கேட்டதற்கு முதல் காரணம், இது செல்வராகவன் படம். ஆயிரத்தில் ஒருவன் படத்திற்கு பிறகு வரும் செல்வராகவனின் படம் என்பதால் படத்தின் மீதும் பாடல்கள் மீதும் எக்கச்சக்கச்சக்க எதிர்பார்ப்பு. பாடல்கள் அந்த எதிர்பார்ப்பை பூர்த்தி செய்ததா...?

நான் சொன்னதும் மழை வந்துச்சா...

மேற்கத்திய இசையையும், கிராமிய இசையையும் கலந்துகட்டி ஒரு காக்டெயிலாக படைத்திருக்கிறார் ஜிவி. நரேஷின் உற்சாகமான குரலுடன் பயணிக்கும் பாடலின் இடையே ஒரே ஒரு வரிக்காக வழி மரிக்கிறது ஒரு பெண்குரல், அந்த இடம் அருமை. பாடியவர் யாரென்று தெரியவில்லை. (சைந்தவி...?) இந்தப்பாடல் படத்தில் இடம்பெறுமா என்ற சந்தேகமும் இருக்கிறது. ஆயிரத்தில் ஒருவன் மாலை நேரம் பாடலைப் போல ஆகிவிடக்கூடாது.

பிறை தேடும் இரவிலே...

மென்மையான பியானோ இசையுடன் ஆரம்பிக்கிறது பாடல். ஜிவி இசை – சைந்தவி குரல் இரண்டும் கலந்தால் வேறென்ன லவ்ஸ்தான். சைந்தவி குரல் வழக்கத்தை விட இனிமையாக இருக்கிறது. காரணம் ஜிவி பிரகாஷோ...? பாஸ், இப்படியெல்லாம் பாட வைத்தால் அப்புறம் நாங்களும் ஷைந்தவியை லவ் பண்ண ஆரம்பிச்சிடுவோம். பாடலின் வரிகள் காதல் கொண்டேன் படத்தின் நெஞ்சோடு கலந்திடு பாடலை அப்படியே நினைவூட்டுகிறது.

இசைக்கு அப்பாற்பட்டு இந்த பாடலை பற்றிய என் கருத்து, இது காதலா...? இல்லை காமமா...? இல்லை இரண்டுக்கும் நடுவிலான உறவா...? இந்த மாதிரி மேட்டரெல்லாம் கேட்டு, பார்த்து போர் அடிச்சிடுச்சு சாமிகளா... தயவு செஞ்சு புதுசா ஏதாவது யோசிங்க.

ஓட ஓட ஓட தூரம் குறையல...

இது ஒரு வசனப்பாடல். அதாங்க, திருடா திருடி படத்தில் உன்னை பார்த்த பிறகுதான்னு ஒரு பாட்டு வருமே... அந்த வகையறா. பாடலை பாடியிருப்பவர்... ச்சே பேசியிருப்பவர்... அப்படியும் சொல்ல முடியாது... சரி குரல் கொடுத்திருப்பவர் தனுஷ்...! வழக்கமான தனுஷ் கேரக்டரில் ஒரு வடை கிடைக்காத வருத்தம் தெரியுமே... அது இந்தப்படத்திலும், இந்தப்பாடலிலும் தொடர்கிறது போல. பாடலின் இறுதியில் வரும் விசில் ரீங்காரம் ரிங்டோனாக ஒரு வலம்வரலாம்.

என்னென்ன செய்தோம் இங்கு...

அட, செல்வராகவன் படத்தில் பக்திப்பாடலா என்று வியக்க வைக்கிறது இந்தப்பாடல். பக்திப்பாடல்களுக்கே உரிய கம்பீரமான குரலுடன் கம்பேக் கொடுத்திருக்கிறார் ஹரீஷ் ராகவேந்திரா. கர்நாடக இசைப்பிரியர்களுக்கு விருந்தாக அமையலாம். மற்றபடி சாமான்ய ரசிகனுக்கு பிடிப்பதற்கு வாய்ப்புகள் குறைவு. இது படத்தில் எந்த சூழ்நிலையில் வரும், எங்கே சொருகப்பட்டிருக்கும் என்று யோசிக்க வைக்கிறது. 

காதல் என் காதல்...

காதல் தோல்வி, கூடவே சரக்கு இரண்டும் இணைந்தால் புலம்பல்கள். அதையே பாடலாக உருவாக்கியிருக்கிறார்கள். அட, செல்வராகவனும், தனுஷும் இணைந்து பாடியிருக்கிறார்கள். செல்வராகவன் குரல் கேட்பதற்கு இனிமையாக இல்லையென்றாலும் புதுமையாக இருக்கிறது. பாடலில் புகுந்து விளையாடும் கடம் இசை, அஞ்சலை பாடலை நினைவூட்டுவதை தவிர்க்க முடியவில்லை.

மயக்கமென்ன தீம் மியூசிக்

வழக்கமாக செல்வா படங்களில் இரண்டு தீம் இசையாவது இருக்கும். ஆயிரத்தில் ஒருவன் படத்தில் இடம்பெற்ற Celebration of Life இசையை மறக்க முடியுமா...? இந்தப்படத்தில் ஒன்றுதான். ஆனால் ஏமாற்றம் தராத வகையில் ஒலிக்கிறது. கிடார் இசை பின்னி பெடலெடுக்கிறது. மூன்று நிமிடப்பாடலில் முதலிரண்டு நிமிடங்கள் அசத்தல், மூன்றாவது நிமிடம் இரைச்சல்.

எனக்குப் பிடித்த பாடல்: பிறை தேடும் இரவிலே...

எனக்குப் பிடித்த வரிகள்:

கருவாட்டு குழம்பா நீயும் ருசி ஏத்துற...

ஒருவாட்டி தின்னு பாக்க உசுப்பேத்துற...

ஃபியூஸ் போனபின் பல்புக்கான சுவிட்சை தேடுறேன்...

சுத்துது சுத்துது தலையும் சுத்துது குப்புன்னு அடிச்ச பீருல...

படுத்துக்க படுத்துக்க ஒடனே தெளிஞ்சிடும் காலைல அடிக்கிற மோரினில...

என்னுடைய ரேட்டிங்: 7.5 / 10

இந்த ஆல்பத்தின் வாயிலாக ஜிவி பிரகாஷ் ஒரு நல்ல இசையமைப்பாளர் என்பதை நிரூபித்தது மட்டுமில்லாமல், தனுஷ் ஒரு நல்ல பாடகராகவும், செல்வராகவன் ஒரு நல்ல பாடலாசிரியராகவும் உருவெடுத்திருக்கிறார்கள். வழக்கமான செல்வராகவன் படங்களின் பாடல்கள் போல வசீகரிக்கவில்லை என்றாலும் இது போதும்டா மச்சான்...!

சமீபத்தில் எழுதியது: ஏழாம் அறிவு - இசையா...? இரைச்சலா...?

என்றும் அன்புடன்,

N.R.PRABHAKARAN

Post Comment