நக்மாயிசம்...!

அன்புள்ள வலைப்பூவிற்கு,

நந்திதா மொராஜி என்று சொன்னால் உங்களுக்கு தெரிய வாய்ப்பில்லை. அதுதான் தமிழகத்தை ஒரு பீரியட்டில் உலுக்கிய நடிகை நக்மாவின் நிஜப்பெயர். நாற்பத்தியொரு வருடங்களுக்கு முன்பு மும்பையில் பிறந்த ரம்பை.

1990ம் ஆண்டு தனது கலைச்சேவையை நக்மா பாலிவுட்டில் ஆரம்பித்தபோது அவர் தமிழ் சினிமா ரசிகர்களை ஆட்டிப்படைக்க போகிறார் என்று யாரும் கணித்திருக்க மாட்டார்கள். ஆரம்பத்தில் சில மொக்கையான இந்தி படங்களில் நடித்து வந்த நக்மா, பின்னர் தெலுங்கு தேசத்தில் தஞ்சம் புகுந்தார். நக்மாவும் மற்ற நடிகைகள் போல தொடக்கத்தில் இழுத்திப்போர்த்திக்கொண்டும் சல்வார் கமீஸ் அணிந்துக்கொண்டும் நடித்திருக்கிறார். ஆனால் அதைத்தான் விரும்பியதா இந்த சமுதாயம்...??? படுக்கையில் பாலகிருஷ்ணாவோடு புரளவிட்டார்கள், மழையில் நாகார்ஜுனுடன் நனையவிட்டார்கள். குறிப்பாக அல்லரி அல்லுடு படத்தில் மழையில் நனைந்தபடி அவர்போட்ட கெட்ட ஆட்டத்தை தெலுங்கு சினிமா ரசிகர்கள் மறந்திருக்க மாட்டார்கள்.

இவ்வாறாக திரையுலக வாழ்க்கையை தொடர்ந்துக்கொண்டிருந்த நக்மாவை தமிழ் ரசிகர்களுக்கு அறிமுகப்படுத்திய பெருமை இயக்குனர் ஷங்கரையே சேரும். ஷங்கர் என்றாலே பிரம்மாண்டம் இன்று பல தரப்பினரும் பரவலாக பேசுவதற்கு ஷங்கர் அன்று நக்மாவை அறிமுகப்படுத்தியதே காரணம் என்று நினைக்கிறேன். அந்தப்படத்தில் ஷ்ருதி என்ற கேரக்டரில் நடித்த நக்மா தமிழக இளைஞர்களின் குருதியை சூடாக்கினார். முக்காபுலா பாடலில் Cow Girl-ஆக தோன்றிய நக்மா நம் பெற்றோருக்கு மாட்டுப்பெண்ணாக வரமாட்டாரா என்று இளைஞர்கள் ஏங்கித்தவித்தார்கள்.

காதலனுக்கு காதலியாக நடித்த நக்மாவுக்கு அடுத்த ஆண்டே அடித்தது லக்கி சான்ஸ் – ரஜினி பட ஹீரோயின். “நீ நடந்தால் நடையழகு... நீ சிரித்தால் சிரிப்பழகு... நீ பேசும் தமிழழகு...” போன்ற வரலாற்று சிறப்புமிக்க வரிகளை வைரமுத்து ரஜினிகாந்துக்காகத்தான் எழுதினார் என்று சொன்னால் நம்பவா போகிறீர்கள். அதை உறுதிப்படுத்தும் விதமாக ஃபிகர் பிகருதான் நீ சூப்பர் பிகருதான் என்று சூப்பர் ஸ்டாரே வாய்ஸ் கொடுத்தார். தன்னுடைய பால் வெள்ளை நிறத்தால் கோடிக்கணக்கான ரஜினி ரசிகர்களின் மனதை கொள்ளை அடித்தார்.

ஒரு காலத்தில் தமிழ்நாட்டு பெண்கள் தங்களுக்கு அரவிந்த்சாமி மாதிரி மாப்பிள்ளை வேண்டும் என்று விரும்புவார்கள். அதேபோல் தான் இளைஞர்கள் பலர் தங்களுக்கு நக்மா மாதிரி மனைவி கிடைக்க வேண்டுமென்று கனவு கண்டார்கள். காதலன் படத்தின் மூலம் எப்படி இளைஞர்களை ஈர்த்தாரோ அதேபோல பாட்ஷா படத்தின் மூலம் நடுத்தர வயதுக்காரர்களையும் கவர்ந்திழுத்தார். பாட்ஷா படம் வந்த புதிதில் மனைவிக்கு தெரியாமல் பல கணவர்கள் தங்கள் பர்ஸில் நக்மா போட்டோவை வைத்திருந்தார்கள்.

காதலன், பாட்ஷா என்று இரண்டு புயல்கள் தமிழகத்தின் கரையை கடந்தபின் மேட்டுக்குடி என்ற படத்தில் யக்கா மக இந்துவாக தோன்றினார் நக்மா. இந்தப்படத்தில் தலைவர் கவுண்டமணிக்கு இணையாக நக்மா ஆடிய துடிப்பான நடனம் இதோ உங்கள் பார்வைக்காக...

காலப்போக்கில் நன்றி மறந்த தமிழ் ரசிகர்கள் நக்மாவையும் மறக்கத் தொடங்கினார்கள், நக்மாவும் சில மொக்கைப் படங்களில் நடித்து தன்னுடைய இமேஜை கொஞ்சம் கொஞ்சமாக இழந்தார். சரத்குமார், சத்யராஜ், பிரபு போன்ற சீனியர் நடிகர்களுடன் ஜோடி சேரும் நிலைக்கு தள்ளப்பட்டார். ஆனால் இருபத்தி ஓறாம் நூற்றாண்டின் தொடக்கத்தில் நக்மா தீனா படத்தில் குத்தாட்டம் போட்டு ஒரு ரீ-என்ட்ரி கொடுத்தார். சிட்டிசன் படத்தில் நக்மா துப்பாக்கியை மேலே உயர்த்திக் காட்டியபோது ரசிகர்கள் மனதில் புல்லட்கள் பாய்ந்தன. 

இதற்குள்ளாக நக்மாவின் தங்கை ஜோதிகா என்ட்ரி கொடுக்க, நக்மா போஜ்புரி படங்களில் நடிக்க பறந்துவிட்டார். போஜ்புரி படங்களில் பிரபலமான ரவி கிஷனுடன் இவர் நடித்த படங்கள் செம ஹாட். நடிகைகள் என்றாலே கிசுகிசுக்களுக்கு பஞ்சம் இருக்காது. நக்மா மட்டும் விதிவிலக்கா என்ன...? சரத்குமாரில் ஆரம்பித்து அசாருதீன், கங்குலி, தாவூத் இப்ராஹீம் என்று தேசிய அளவில் ஒரு கலக்கு கலக்கிவிட்டார்.

மதநல்லிணக்க மங்கை:

நக்மா பற்றி பலரும் அறிந்திடாத தகவல். நக்மாவின் தந்தை ஒரு ஹிந்து. தாய் ஒரு இஸ்லாமியர். நக்மா பிறந்தது கிறிஸ்மஸ் தினத்தில். கிறிஸ்மஸ் அன்று பிறந்ததாலோ என்னவோ நக்மா நாளடைவில் கிறிஸ்தவ மதத்தில் இணைந்து மத போதகராகிவிட்டார். சமீபத்தில் அவருடைய ஜெபக்கூட்ட வீடியோ ஒன்றை பார்த்து நக்மா நினைவுகள் மலர்ந்து இந்த அரிய பெரும் பதிவினை எழுதி அதை நக்மாவிற்காக சமர்ப்பிக்கிறேன்.

இந்த வீடியோவில் சகோதரி நக்மா என்று ஸ்லைடு போட்டவனைத் தான் தேடிக்கொண்டிருக்கிறேன்.

என்றும் அன்புடன்,

N.R.PRABHAKARAN

Post Comment