கர்ணன் – கொண்டாட்டத் துளிகள்

அன்புள்ள வலைப்பூவிற்கு,

நடிகர் திலகம் சிவாஜி அவர்களின் படத்தை சாந்தி திரையரங்கில் பார்ப்பது என்பது சிங்கத்தை அதனுடைய குகையில் சென்று சந்திப்பதை போன்றது. அப்படியொரு பொன்னான வாய்ப்பை ஏற்படுத்தி கொடுத்த மாமா அவர்களே... (இது பலே பாண்டியா ஸ்டைல்) உங்களுக்கு எனது நன்றிகள்.

ஆறரை மணிக்கு தொடங்க இருந்த காட்சிக்கு கிட்டத்தட்ட ஐந்து மணிக்கே அட்டன்டன்ஸ் போட்டாச்சு. மாமா அவர்கள் அதற்கு முன்பே அங்கே பூரித்துக்கொண்டிருந்தார். எனது மாமா மட்டுமல்லாமல் மற்றுமுள்ள உறவினர்கள் மத்தியில் நமக்கு ஒரு பத்திரிக்கையாளர் இமேஜ் இருப்பதால் அதை கட்டிக்காக்கும் விதமாக தம்மாத்தூண்டு மொபைல் கேமராவை வைத்துக்கொண்டு என்.டி.டி.வி. ரிப்போர்ட்டர் மாதிரி சுற்றிச்சுழன்று சீன் போட்டுக்கொண்டிருந்தேன். இனி...

ஒரு சாம்பிள் பேனர்

- சாந்தி திரையரங்க வளாகம் முழுவதும் பேனர்கள் குவிந்திருந்தது, சைஸ் வாரியாக இருந்த பேனர்களின் எண்ணிக்கை மட்டுமே சுமார் ஐம்பதை தாண்டும். “இதயராஜா சிவாஜி பித்தர்கள்”, “கலைத்தாயின் தெய்வமகன் சிவாஜி மன்றம்”, “சிவாஜியின் சித்தர்கள் கலைநிலா சிவாஜி மன்றம்”, “இதயவேந்தன் வாசகர் வட்டம்” என விதவிதமான பெயர்களில் மன்றங்கள்.

- இவை போதாதென்று சுவரெங்கும் சிவாஜி பற்றிய செய்தித்தாள் சேகரிப்புகள், “இதயராஜா”, “இதயவேந்தன்”, “தெய்வமகன்” போன்ற இதழ்களின் அட்டைப்படங்கள். செய்தித்தாள்களில் சிவாஜி மற்றும் எம்.ஜி.ஆர் பற்றிய செய்திகள் ஒருசேர வந்திருக்கும் பட்சத்தில் எம்.ஜி.ஆர் பெயரை மட்டும் லாவகமாக மையிட்டு அழித்திருந்தார்கள்.

- நான் உள்ளே நுழைந்த சமயம் கம்பீரமாக பேண்டு வாத்தியங்கள் முழங்க, பிரம்மாண்டமாய் பிரம்மாண்டமாய் ஒரு மாலையை சிவாஜியின் மெகா பேனருக்கு சூட்டும்பொருட்டு உயிரை பணயம் வைத்து அந்தரத்தில் நின்றுக்கொண்டிருந்தார்கள் சில சிவாஜி ரசிகர்கள். இந்த பிரம்மாண்ட மாலையின் ஏற்பாட்டாளர்கள் கர்நாடக மாநிலத்தை சேர்ந்த சிவாஜி ரசிகர்கள் என்பது குறிப்பிடத்தக்கது.

- அடுத்து நீளமானதொரு பத்தாயிரம் வாலா சரவெடியை வாசலில் இருந்து ரோடு வரைக்கும் சிவப்பு கம்பளமாக விரித்து பற்ற வைத்தார்கள். வெடியின் சத்தம் அடங்குவதற்கு மட்டுமே மூன்று நிமிடங்கள் ஆனது.

- சிறிது நேரத்தில் பரபரப்பாக ஒரு இன்னோவா உள்ளே நுழைய, யாரு யாருன்னு எல்லோரும் பதட்டத்துடன் பார்க்க உள்ளே இருந்து இறங்கியவர் ஜூனியர் சிவாஜி (!!!) துஷ்யந்த். அவரைச் சுற்றி சில ரசிகர்கள் சூழ்ந்துக்கொள்ள, மற்றசில ரசிகர்கள் “தாத்தா இடத்தை நீயில்லை... எவனாலயும் நெருங்க முடியாது...” என்று அவர் காதுபடவே கோஷமிட்டார்கள்.

ஜூனியர் சிவாஜி

- சரசரவென திரையரங்க வாயிலை நோக்கி விரைந்த துஷ்யந்த், அங்கே இதயரஜா சிவாஜி பித்தர்கள் சார்பாக ஏற்பாடு செய்யப்பட்டிருந்த அன்னதான விழாவை தன் கரங்களால் தொங்கிவைத்துவிட்டு சென்றார்.

- கோவில் திருவிழாக்களில் வீக்கான சிலருக்கு மட்டும் சாமி வருமே. அதேபோல ஒரு ரசிகருக்குள் சிவாஜி வந்துவிட அவர் தொடர்ந்து சிவாஜி பாடல்களை ஸ்டெப் போட்டு ஆடிக்கொண்டே பாடிக்கொண்டிருந்தார். அதற்கும் பக்கத்திலிருந்த டாஸ்மாக்கிற்கும் எந்த சம்பந்தமும் இல்லையென்று நம்புவோமாக...!

- இன்னொரு சிவாஜி ரசிகர் கரகாட்ட கலைஞரை போல தனது தலையில் டர்பன் ஒன்றினை வைத்து ஆடிக்கொண்டிருந்தார். ஆர்வமிகுதியில் அவர் தன் தலையில் சூடம் ஏற்ற முயற்சிக்க, அருகிலிருந்த கடமை தவறாத போலீஸ் அதிகாரி எஸ்.பி.செளத்ரி “வேண்டாம் சார்... ரிஸ்க்” என்று எச்சரித்து கலைஞரை தீக்குளிப்பிளிருந்து காப்பாற்றினார்.

- “உட்லண்ட்ஸ்ல குடியிருந்த கோயில் ரிலீஸ் பண்ணியிருக்காங்களாமே...” என்று சிவாஜி ரசிகர்கள் யாரையாவது சீண்டினால், “அது டுபாக்கூர் ப்ரிண்டுங்க”, “தியேட்டர்ல ஈ ஓட்டுறாங்களாம்”, “வேணும்னே தொப்பித்தலையன் படத்தை போட்டிக்கு ரிலீஸ் பண்ணியிருக்குறானுங்க” என்று ஏகத்துக்கும் பொங்குகிறார்கள்.

- படம் தொடங்க சில நிமிடங்கள் மட்டுமே இருந்த தருவாயில் மற்றொரு வி.ஐ,பி கார் வந்து நின்றது. உள்ளே இருந்து இறங்கியவர் ஒய்.ஜி.மகேந்திரன். அவர் மட்டுமே அன்றைய ஷோவிற்கு அறுபது டிக்கெட்டுகள் புக் செய்திருந்ததாக தகவல்.

- அவரைத் தொடர்ந்து வருகை தந்தவர் விவேக்கின் “சாத்தப்பன்” காமெடி நடிகர். சாத்தப்பன் மட்டும் வந்ததும் நேரே உள்ளே நுழையாமல் போட்டோ எடுக்க விரும்பியவர்களுக்கு போஸ் கொடுத்துக்கொண்டிருந்தார்.

- வருவார், வருவார், வந்திருப்பார், வந்திருக்கார் என்று பலரும் பலவிதமாக சொல்லிக்கொண்டே இருந்த மற்றொரு வி.ஐ.பி. இயக்குனர் சேரன். அவர் வந்ததாகவும் ஆப்பரேட்டர் அறையில் அமர்ந்து படம் பார்த்ததாகவும் சிலர் சொல்கிறார்கள்.

- ஒவ்வொரு முறை சிவாஜியை க்ளோசப்பில் கட்டும்போது, சிவாஜி சிரிக்கும்போது, சிவாஜி கர்ஜனையாக வசனம் பேசும்போது, சிவாஜி வெட்கப்படும்போது என்று தொடர்ந்து திரையரங்கில் கை தட்டல் சத்தமும், விசில் சத்தமும் கேட்டுக்கொண்டே இருந்தன.

- படத்தில் ஜெயலலிதாவின் அம்மா, கனகாவின் அம்மா, வி.எஸ்.ராகவன், இடிச்சப்புளி செல்வராஜ், சண்முகசுந்தரம் என பல பழம்பெரும் நடிக, நடிகைகளை காண முடிந்தது.

- படத்தில் சிவாஜிக்கு எதிரான பத்திரங்களை ஏற்று நடித்தவர்கள் தொடர்ச்சியாக வசைமொழிகளை வாங்க வேண்டியிருந்தது. குறிப்பாக சிவாஜியின் மாமனார் கேரக்டரில் நடித்தவரை நாலைந்து தலைமுறைகளை தோண்டி எடுத்து திட்டினார்கள்.

- இரண்டாம் பாதி தொடங்கி படம் ஓடிக்கொண்டிருக்கும்போது, படம் பார்க்க வந்த எம்.ஜி.ஆர் ரசிகர் ஒருவர் எம்.ஜி.ஆரை உயர்வாக சொன்னதாலோ / சிவாஜியை தரக்குறைவாக பேசியதாலோ (என்னவென்று தெரியவில்லை) சுமார் இருபது பேர் கொண்ட குழுவால் சட்டை கிழிக்கப்பட்டு, அடித்து, உதைத்து, தரதரவென்று வெளியே இழுத்துச் செல்லப்பட்டார்.

- படத்தின் பழைய ப்ரின்ட்டை நான் பார்த்திராததால் அது பற்றிய வித்தியாசங்களை என்னால் கூற முடியவில்லை. ஆனால் சில இடங்களில் ஒரு காட்சியிலிருந்து அடுத்த காட்சிக்கு மாறும்போது பிரிண்ட் வித்தியாசம் அப்பட்டமாக தெரிகிறது.

- பல வருடங்கள் கழித்து சிவாஜி படம் ஒன்றினை புதுபித்து ரிலீஸ் செய்ய நினைத்தவர்கள், சிவாஜி இறப்பது போன்ற கதையமைப்பை கொண்ட படத்தை தேர்ந்துடுக்காமல் இருந்திருக்கலாம் என்பது நிறைய ரசிகர்களின் வருத்தம்.

- இதனினை ஒரு நல்ல தொடக்கமாக வைத்துக்கொண்டு இனி சிவாஜி படங்களை மெருகேற்ற நினைப்பவர்கள் புராண படங்களை புறந்தள்ளி, பராசக்தி போன்ற சமூகப்படங்களையோ, வீரபாண்டிய கட்டபொம்மன், கப்பலோட்டிய தமிழன் போன்ற சரித்திர படங்களையோ அல்லது உத்தமபுத்திரன், பலே பாண்டியா போன்ற ஜாலி டைப் படங்களையோ புதுபித்தால் சிறப்பாக இருக்கும்.

- படத்தின் இறுதிக்காட்சியில் தன்னுடைய ஒரே மகனை பறிகொடுத்துவிட்டதாக தர்மத்தாய் அழுது புலம்புகிறார். நியாயப்படி கலைத்தாயும் தானே அழுதிருக்க வேண்டும்.

என்றும் அன்புடன்,

N.R.PRABHAKARAN

Post Comment