கண்கலங்க வைத்த வெங்காயம்

அன்புள்ள வலைப்பூவிற்கு,

ஏறிவந்த ஏனிப்படிகளை எட்டி உதைக்கும் சினிமாக்காரர்களுக்கு மத்தியில், தன்னைப்போலவே சிரமப்பட்டு சினிமாவுக்குள் நுழைந்தவொரு தோழரை கை கொடுத்து தூக்கியிருக்கும் சேரனுக்கு முதல் பொக்கே...!

ஏற்கனவே அரவான் படத்திற்கு அழைத்துச்சென்று பலி கொடுத்தமையால், சினிமாவுக்கு போகலாமா டாடி என்றவுடன் என் தந்தை பதறினார். வரவேமாட்டேன் என்று முரண்டு பிடித்தவரிடம் இயக்குனர் திராவிடர் கழக உறுப்பினர் அட்டை வைத்திருக்கிறாராம் என்று ஒரு பிட்டை போட்டதும் உற்சாகமாக கிளம்பினார். வழக்கமாக மாஸ் ஹீரோக்கள் படத்தை மட்டுமே திரையிடும் ஐட்ரீம்ஸ் திரையரங்கில் வெங்காயம் திரையிடப்பட்டிருந்தது ஆச்சர்யமான விஷயம்தான். டைட்டிலில் வீரத்தமிழன் சத்யராஜ், பாடல்கள் அறிவுமதி, சுப.வீரபாண்டியன் போன்றவற்றை பார்த்ததும் அப்பாவுக்கு இன்னும் நம்பிக்கை பிறந்திருக்கும்.

ஜோதிடர்கள், மந்திரவாதிகள், சாமியார்கள் செய்யும் அயோக்கியத்தனங்களால் சாமான்யர்களின் வாழ்க்கை எப்படியெல்லாம் மாறுகிறது என்பதே படத்தின் ஒன்லைன். அதையே கொஞ்சம் கமர்ஷியலாக தர விரும்பி காதல், கடத்தல் போன்ற மசாலாக்களை வெங்காயத்துடன் சேர்த்து வெங்காய சாம்பார் படைத்திருக்கிறார் இயக்குனர்.

இரு இளைஞர்கள் சொந்தமாக தொழில் தொடங்க விரும்பி, ஜோதிடரிடம் செல்கிறார்கள். அவர்களில் ஒருவருக்கு நேரம் சரியில்லை என்றும் அவரை அண்டுபவர்கள் அழிந்துவிடுவார்கள் என்றும் ஜோதிடர் சொல்கிறார். நண்பர்களுக்குள் விரிசல் விழுந்து, விரக்தியடைந்த நேரம் சரியில்லாதவர் தற்கொலை செய்துகொள்கிறார். கூத்துக்கலைஞர் ஒருவர் தன்னுடைய தாயில்லாத மகனின் நோயை குணப்படுத்தும் பொருட்டு கடனை வாங்கி வெளியூருக்கு செல்கிறார். போன இடத்தில், அவருக்கு தெரியாமல் அவரது மகனை அழைத்துச்சென்று நரபலி கொடுத்துவிடுகிறார் ஒருவர். தன்னிடம் திருமண பொருத்தம் கேட்க வந்த பெண்ணை தோஷம் கழிக்கிறேன் என்று கற்பழிக்க முயற்சிக்கிறார் ஒரு மந்திரவாதி. இப்படியெல்லாம் எங்கேயாவது நடக்குமா என்று கேட்க முடியாதபடி, அடிக்கடி நாம் செய்தித்தாள்களில் படிக்கும் அபத்தமான செய்திகளை வைத்தே கதை பின்னப்பட்டிருப்பது படத்திற்கு மிகப்பெரிய ப்ளஸ்.

நாயகன் – நாயகியாக அலெக்சாண்டர் – பவினா என்கிற புதுமுக நடிகர்கள் நடித்திருக்கிறார்கள். ஆனால் பகுத்தறிவே படத்தின் பிரதான நாயகனாக விளங்குகிறது. ஒரேயடியாக கடவுள் மறுப்பை கையில் எடுக்காமல் மூட நம்பிக்கைகளை மட்டும் சாடியிருப்பது இயக்குனருடைய சாமர்த்தியம்.

அலெக்சாண்டர் பவினா காதல் காட்சிகள் ஆரம்பத்தில் படத்திற்கு தேவையே இல்லாதது போல தெரிந்தாலும் பிற்பாதியில் அதுவே பிராதன கதையுடன் சென்று இணைந்துக்கொள்கிறது. ஹீரோயின் கூட அதே மாதிரி தான். பார்க்க பிடிக்கவில்லை என்றாலும் பார்க்க பார்க்க பிடிக்கிறது.

ஹீரோயினுடைய அம்மாவாக வருபவர், கூத்துக்கலைஞர், கூத்துக்கலைஞரின் மகள் போன்றவர்கள் சிறப்பாகவும் இயல்பாகவும் நடித்திருக்கிறார்கள். குறிப்பாக கூத்துக்கலைஞரின் மகளாக வருபவர் மனதில் தங்கையாகவே தோன்றி பரிதாபம் ஏற்படுத்துகிறார். கார் விபத்து காட்சி மைனா படத்தை நினைவூட்டினாலும் சில நிமிடங்கள் பதற வைக்கிறது. சத்யராஜ் தோன்றும் பாடலின் வரிகள் அறிவுமதி எழுதியதா, சுபவீ எழுதியதா என்று தெரியவில்லை. அற்புதம். 

கருத்து சொல்லும் / சொல்ல முனையும் படைப்புகள் மீது கல் வீசுவது என்னுடைய கொள்கையல்ல என்றாலும் ச்சே படத்தை வேறு மாதிரி இன்னும் சிறப்பாக எடுத்திருக்கலாமே என்ற ஆதங்கத்தை தவிர்க்க முடியவில்லை. தவிர, இயக்குனர் பதிவர்களின் நண்பர் என்பதால் சில தவறுகளை சுட்டிக்காட்டுகிறேன். Take it as a constructive criticisation.

மிகப்பெரிய மைனஸ். படத்தில் மூடநம்பிக்கையை எதிர்க்கும் அனைவருமே ஏதோ ஒரு விரக்தியிலும் இழப்பின் காரணமாகவுமே எதிர்க்கிறார்கள், கடைசி காட்சியில் கதாநாயகன் உட்பட. குறிப்பிட்ட சிலரைத் தவிர மற்றவர்கள் நடிப்பு பயங்கர மோசம். இதுபோன்ற படங்களில் வசனங்கள் ஷார்ப்பாக இருப்பது அவசியம். தேவடியா பசங்கன்னு திட்டுவதையெல்லாம் ரசிக்க முடியவில்லை. அந்த வார்த்தையை பயன்படுத்துவதே பகுத்தறிவுக்கு புறம்பானது. கற்பழிப்பு முயற்சி காட்சியை தந்தைக்கு அருகிலிருந்து பார்க்க சிரமப்பட்டேன். மார்க்கெட்டிங்கை பொறுத்தவரையில், குறைந்தபட்சம் தினத்தந்தியிலாவது விளம்பரம் கொடுக்கவும். படம் பார்க்கலாம் என்று முடிவு செய்துவிட்டால் கூட படம் எங்கே ஓடுகிறது என்று தெரிந்துக்கொள்வது கடினமாக இருக்கிறது.

மற்றபடி உணர்ச்சிப்பூர்வமாக பார்த்தால் வெங்காயம் ஒரு காஸ்ட்லியான காவியமே...!

என்றும் அன்புடன்,

N.R.PRABHAKARAN

Post Comment